الله محبة

الله محبة

 
الرئيسيةاليوميةس .و .جبحـثلوحة التحكمالتسجيلدخول

شاطر | 
 

  الي خاصته جاء اسكتش جميل

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Abanob malak
ــــــــــــــــــــــــــــــــــ
ــــــــــــــــــــــــــــــــــ
avatar


العــــمــــــــر : 26
عدد المساهمات : 30
ذكر

مُساهمةموضوع: الي خاصته جاء اسكتش جميل    السبت فبراير 12, 2011 12:57 am

الي خاصته جاء اسكتش جميل
يدخل ناجي وهو يحمل شنطة سفر )
ناجي : ياه البلد لسه زي ما سبتها من 20 سنة...غريبة مفيش حد ولا ايه؟
البلد هس هس .الا ما في حد سالني انت رايح فين ولا جاي منين هما كدة اهل
البلد محدش ليه دعوة بحد ( يدخل شحاتة )
شحاتة : يا تري د انس ولا جن ... انت يا جدع انت. ايه اللي ممشيك في العتمه؟
ناجي : هو انا لاقيت نور ممشيتش فيه
شحاتة : انت منين ؟
ناجي : انا من اهل البلد
شحاتة : يا سلام من انهي بلد يا خويا؟
ناجي : ( ينظر اليه ) شحاتة ؟
شحاتة : وكمان عارف اسمي يا خواجة ؟
ناجي : انا مش خواجه بصلي كويس
شحاتة : اني مش فاكرك بس الصوت مش غريب علي
ناجي : فاكر يا شحاتة لما كنا زمايل في المدرسة .. فاكر لما عملنا ديل ورق وعلاقناه في جلابيتك ابوك
شحاتة : لا مش فاكر
ناجي : طيب فاكر لما نزلت الترعة وانا سرقت هدومك وروحتك عريان ...انا ناجي
شحاتة : ناجي المرحوم ناجي؟ انا مش مصدق عنيا ( ثم ياخذوا بعض بالحضن ) عجيبة ناجي حي ... طول عمرك بتاع مقالاب بس ده اغرب مقلب
ناجي : مقلب ايه ؟
شحاتة : انك تيجي البلد تاني بعد 20 سنة داحنا نسيناك.. دي حتي امك لسه لابسة اسود عليك لحد دلوقتي اوم تيجي من الموت كدة فجاءة
ناجي : موت موت ايه يا راجل مانا بعتلكم جوابات كتير
شحاتة : مكناش بنصدقها
ناجي : والناس اللي بعتهم
شحاتة : كنا بنقول عليهم نصابين وكدابين ....وانت ايه سبب الغيبة دي كلها يا ناجي ؟
ناجي : انا كنت بدور علي علاج لابويا والم فلوس لاهلي مانت عارف مرض ابويا نادر وعلاجه مش متوفر
شحاتة : ولاقيت العلاج ؟
ناجي : الحمد لله خلاص ابويا هيخف وامي هتفرح ... هما عاملين ايه؟
شحاتة : حالتهم تعبانة قوي قوي
ناجي : خلاص انا رجعت وانشاء الله هعوضهم عن الفقر والجوع والمرض .. يا تري الاقيهم صاحيين دلوق
شحاتة : صاحيين ايه دول بينامو من المغربية.. وبعدين انت لو روحت وقلتلهم
انك ناجي ابنهم اللي كان غايب عنهم من 20 سنة هيطبو ساكتين ..انت تبات عندي
الليله دي والصبح ترحلهم
ناجي : انا جاتني فكرة ايه رايك لو اروح لهم علي اني غريب وجاي ابت عندهم والصبح اقولهم انا مين
شحاتة : مقلب جديد من مقالبك.. ماشي يا ناجي وانا الصبحية هاجي ومعايا كل صحابك وحبيبك علشان يسلموا عليك
ناجي : يالا بينا


( يدخل الاب والام ثم يطرق الباب )
الام : مين اللي بيخبط الساعة دى ؟
الاب : مين برة
ناجي : عابر سبيل وجاي من سفر بعيد وتعبان
الام : ( للاب ) افتح له؟
الاب : افتحي له ( تفتح الام ويدخل ناجي )
ناجي : مساء الخير
الام : يسعد مساك
الاب : أتفضل يا ابني استريح
الام : شكلك مش غريب علي انت منين؟
ناجي : انا من الناحية دي وجاي من بلاد بره جاي ادور علي اهلي وناسي ... اصل بقالي 20 سنة في غربة
الاب : واهلك هيعرفوك بعد 20 سنة؟
ناجي : مش عارف .. بس يارب يعرفوني انا جايب لهم شقا 20 سنة
الام : شقا 20 سنة ايه جايب ايه؟
ناجي : جايب دواء لابويا وفلوس فلوس كتير
الاب : عموما اتفضل استريح .. معلش المكان علي قد الحال
ناجي : لا ابدا .. بس انا لازم ادفع تمن بياتي... أنا معايا فلوس كتير ( ثم يخرج من جيبه فلوس ينظر لها الاب والام بلهفة )
الاب : خلي فلوسك في جيبك يا ابني .. عيب
ناجي : اصلي لازم..
الام : لازم تنام اتفضل يا ابني ( ثم ينام ناجي )
الاب : مش كنتي حطيتيله ياكل لقمة
الام : منين يا حسرة مانت عارف البير وغطاه... صوت خلي قلبي يرف جوايا فكرني بابني ناجي
الاب : ايش جاب لجاب دا حاجة تانية
الام : علي رايك ؟ يعيني عليه تعبان
الاب : بيدور علي اهله لازم لف كتير.. ولو ملاقهمش هيسافر تاني .. هيرجع من مطرح ما جه ...معاه فلوس كتير
الام : قوي جيوبه منفوخة
الاب : فلوس بكوات بكوات مربطة
الام : ورق ملون
الاب : يعني لو سافر تاني .. الفلوس هترجع برة تاني
الام : خسارة
الاب : تفتكري حد شافه وهو جاي علي هنا؟
الام : وهو مين اللي هيسهر للساعة دي
الاب : صح .. كده يبقي عال العال
الام : انت بتفكر في ايه؟
الاب : في اللي انت بتفكري فيه .. غريب وتايه ومعاه فلوس كتير
الام : والفلوس خسارة خسارة ترجع .. واحنا محتاجين لها قوي
الاب : رزق وجالنا لحد بيتنا ولا من شاف ولا من دري .. حطيله في الشاي اقراص النوم اللي كتبهالي الدكتور... وانا هنيمه علي طول
الام : انا خايفة
الاب : لا انت نسيتي ولا ايه عاجبك الفقر اللي احنا فيه .. قوي اعمليله الشاي
الام : طيب ( ثم تقوم الام لعمل الشاي ويخرج ورائها الاب )

( يدخل ناجي وهو يشرب الشاي ثم ينام )
الاب : ها شرب الشاي ؟
الام : ايوه وراح في سابع نومة
الاب : يالا بينا ( ثم يدخلون )
الام : وشه حلو زي ال***
الاب : ودا وقته يا وليه .. ناوليني المخدة
الام : لا بلاش
الاب : ناوليني المخدة ( تعطيه المخدة ) امسكي رجليه لحسن يفلفص
الام : مقدرش
الاب : وبعدين بقي معاكي امسكي رجليه
الام : طيب طيب ( ثم تمسك رجليه ويضع الاب المخدة علي وجه ناجي لكي يقتله )
الاب : خلاص مات .. ( ثم يتجه الاب الي الشنطة ويفتحها ) كل دي فلوس جايبها منين دي
الام : بيقول شقا عشرين سنة
( ثم يفرحون بالفلوس الي ان يدق الباب )
الاب : ايه ده مين اللي جاي
الام : الصبح صبح علينا واحنا مش حاسيين
الاب : طيب لمي الحاجة وغطي الجثة علي ماشوف مين
شحاتة : افتح يا ابو ناجي ( يفتح الاب ) ازيك يا ابو ناجي ازيك يام ناجي امال فين ناجي ؟
الاب : ناجي مين ؟
شحاتة : ناجي ابنك
الام : ناجي ابني مات من 20 سنة
شحاتة : لا دا رجع امبارح دا كان مسافر وانا موصله لحد هنا امبارح بالامارة كان لابس.....
الاب : بتقول ايه اللي كان لابس ....... ناجي ابني
شحاتة : ايوه اصله خفنا عليكم من الفرحة تروحو فيها فعمل نفسه عابر سبيل وبات عندكم امبارح
الام : لا ابني ..
الاب : لا لا ناجي ابني ناجي



الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
الي خاصته جاء اسكتش جميل
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
الله محبة :: منتدى المسرح :: التأليف والنصوص المسرحية :: الأسكتشات-
انتقل الى: